Magandang gabi, narito po ako ngayon sa kahabaan ng National Road dito po sa Laguna kung saan isang taxi at isang bus ang nagsalpukan. Pasado alas-otso po ng gabi kanina nang maganap ang nasabing aksidente. Nang makapanayam namin ang driver ng bus,ayon dito ay malayo pa lang ay tanaw na niya ang pagewang-gewang na takbo ng taxi na kasalubong niya.Tinangka niyang iwasan ang nasabing taxi ngunit huli na nang sumalpok na ito sa harapan ng minamanehong bus. Wala naman pong naiulat na nasaktan sa 39 na pasahero ng bus maliban sa driver nito na nagtamo ng kaunting galos. Ngunit sa kasamaang palad ay nasa malubhang kalagayan ang driver ng taxi at patay ang batang lalaking pasahero nito. Ayon sa imbestigasyon ng mga awtoridad sa pamumuno ni NBI agent Newton Santiago, kinilala ang driver ng taxi na si Roldan DelaCruz at ang anak nitong si Romnick Dela Cruz. Kapwa po sila dinala sa Laguna Medical Hospital kung kaya’t tinatawagan po ng pansin ang mga kamag-anak o kakilala ng mga biktima na makipag-ugnayan sa pulisya. Manatili po kayong nakasubaybay para sa iba pang nagbabagang balita.Ako po si Charlene Martinez, para sa The Anchor:Flash Report.”
“K-Kuya…” naluluhang sambit ni Romeo matapos mapanood sa TV ang balita. Naroon sya sa salas na naghihintay sa Papa at Kuya niya habang naroon sa kusina si Aling Cecille.
